A Asociación Fotográfica Ou´ Potiños, en colaboración co concello do Carballiño, convoca unha nova edición da iniciativa “Pon unha foto na rúa”, que terá lugar o domingo, 28 de xuño, na Praza Maior.

Trátase de convidar os veciños da vila para participar activamente nesta experiencia que se celebra a nivel mundial, como un acto de promoción da fotografía, deixándose fotografar polos integrantes da asociación.

Este evento foi presentado hoxe polo concelleiro de Cultura, Diego Fernández, e o presidente do colectivo fotográfico, Manuel Blanco, no salón de plenos do concello, que se desinfectó previamente, tal e como leva a cabo antes de cada reunión.

Diego Fernández mostrou a súa satisfacción por ser a primeira actividade cultural que se programa e preséntase durante o covid 19, e por iso expresou o seu agradecemento e felicitación ao colectivo Ou´ Potiños. “Teñen a valentía de facer unha actividade cultural, que marca a entrada na nova normalidade, e que se realizará con todas as garantías de prevención e seguridade”, segundo dixo.

Así mesmo, destacou que “falar de fotografía en eOCarballiño e en Galicia, é facelo da asociación Ou´ Potiños”, polo que recoñeceu o valor de dar un paso adiante”.

Manuel Blanco tamén mostrou a súa alegría por poder dar un pouco de vida ao pobo. Dixo que durante estes meses o colectivo estivo parado, pero que estaban moi orgullosos de poder realizar a primeira actividade cultural no Carballiño tras o confinamento polo covid 19. Respecto diso dixo que era o momento de comezar a andar de novo, aínda que tomando todas as medidas de prevención e seguridade requiridas.

A edición de “Pon unha foto na rúa 2020” terá a novidade de que durante a semana anterior van colocar na Praza Maior uns mupis con 16 fotografías de gran formato sobre personaxes do Carballiño.

E o propio día 28 de xuño, colocarase un set para fotografíar ás familias e persoas que o desexen, e sempre mantendo as normas de prevención, desinfectando o set constantemente tras cada uso. Para a montaxe deste set, o colectivo contará coa colaboración dunha empresa especializada en decoración. Oito fotógrafos da asociación encargaranse de realizar as fotografías, que serán expostas posteriormente e que se lles entregarán aos seus protagonistas.

Manuel Blanco asegurou que esta actividade sempre tivo moito éxito no Carballiño, e que esperaba que esta edición fóra tamén moi participativa a pesar das circunstancias.

Finalmente, dixo que en total previron tomar unhas cen fotografas de familias, grupos e persoas.

NOVAS INICIATIVAS

Así mesmo, Manuel Blanco anunciou que o colectivo previu desenvolver máis actividades ao longo deste ano, e que as darán a coñecer proximamente.